NAKO-LA TERRA

N ako – La Terra contat su traballu, sas aspiratziones e sos bisos de sos emigrantes presentes in unu tzentru de acollida in su coro de sa Sardigna.
Sas imàgines e sa boghe de sos protagonistas nos nche leant a àteros logos e a àteras persones chi non bidimus, a sas famìlias chi rechedent agiudu, a sos fìgios pro si los torrare a aunire. Vivimus sa renchènnida issoro, sa suferèntzia fitiana marcada dae sas dudas, intendimus s’oriolu de custas vidas suspèndidas intre duos mundos, su documentàriu nos nche ponet in mesu e nos nche tragat in custos tretos inter-locales.
Nako, però, est fintzas sa terra chi acollit, sa geografia de giassos disconnotos, s’arribu a pustis de unu biàgiu de macos, sa mirada chi chircat de si collocare in su presente, sa chirca de un’apartenèntzia a sa terra, su mudìmene, s’incredulidade de bi l’àere pitzigada, sa netzessidade e s’ammentu de s’oscuridade.
Sos protagonistas nos contant, in manera direta e simbòlica, sas acontèssidas issoro, tràmite àteros contos. Sunt espressiones de s’identidade pròpia, de su patrimòniu culturale de cada unu e testimonias de violèntzias vìvidas. Sos protagonistas de Nako faeddant de sas istòrias personales issoro e nos ponent a disponimentu sas biografias de totu sos emigrantes cuntemporàneos.