Sa chirca visuale e etnogràfica rapresentat un'àmbitu de esploratzione cun limbàgios de narratzione noos contos de sa realidade, tràmite percursos chi aunint s'istùdiu bibliogràficu de sa letura contemporànea subra s'antropologia, s'etnografia e sa sotziologia visuale a sas pràticas de su tzìnema in su reale e sa produtzione documentària.
Sa chirca visuale est una pràtica etnogràfica chi acontesset in “caminu”, in sos giassos de osservatzione e cun sos sugetos in sos logos de sa vida fitiana issoro, a curtzu e cun una temporalidade presa a sa dimensione produtiva de su documentàriu.
A fàghere etnografia visuale cheret nàrrere a abarrare intre sos tretos de ripresa, a costàgiu de sas persones, pro fraigare relatziones fìlmicas noas intre chie biet e chie est bidu, intre ispàtziu e imàgines, esplorende mètodos visuales cun sa fotografia e cun sos vìdeos: osservatzione partetzipante, produtzione sugetiva de imàgines, intervistas, contos de vida, anàlisi documentale / archìvios, auto-rapresentatziones visuales, vìdeu partetzipativu e photovoice.
S’esploratzione visuale chi at isperimentadu su colletivu 4 CaniperStrada, finas a como, at ingendradu unos cantos meledos subra sos sèberos de regia, sas tècnicas de ripresa e subra totu su protzessu de produtzione fìlmica, ponende in discussione – tràmite una pràtica de riflessividade – sas interatziones intre autore/chircadore e sugetos, sos rolos e sos raportos chi naschent cada borta e chi mudant sa pertzetzione sugetiva, intrende in cuntatu, in cada livellu, subra sa costrutzione fìlmica de sos cuntenutos de s’istòria e sa pertzetzione de sa mirada a sa realidade.
Sos progetos de chirca visuale ammaniados dae su colletivu 4CaniperStrada promovent sa creatzione de retes e de network intre sos sugetos chi òperant in Sardigna, in Itàlia e in Europa, s’inclusione de cumpetèntzias multidisciplinares e multiculturales in sa chirca e un’atividade fitiana de difusione e publicatzione de resurtadostràmite su web, s’imprenta, s’organizatzione de addòvios, sas projetziones e sas assembleas pùblicas, in manera de promòvere s’utilidade colletiva de sos resurtados visuales.