FOTOGRAFIA ANALÒGICA / CÀMERA OSCURA
Cun su progettu Officine Fotografiche Caniperstrada dae su 2010 s’assòtziu est impignadu cun sa difusione de su limbàgiu de sa fotografia analògica tramite sa chirca e s’allestimentu de un’ispàtziu multi-disciplinare in ue pòdere fàghere una càmera oscura cumpartzida e una prataforma culturale aberta a atividades diferentes: laboratòrios de isvilupu e imprenta in càmera oscura, workshop temàticos e addòvios cun fotògrafos, sessiones de ritratu e espositziones de autore, cun s’obietivu de creare unu puntu de riferimentu e unu logu de impreu pro sas atividades de istùdiu e de pràtica de sa fotografia analògica.
Laboratorio di Camera Oscura LAFS
Su progetu de Fotografia Isperimentale e su Laboratòriu de Càmera Oscura resurtat sa prima esperièntzia in tzitade de unu logu colletivu pro sa pràtica de sa fotografia analògica, ativu dae su 2010 a su 2014 in su segundu pianu de su Tzentru Culturale Ocupadu Autogestidu Ex-Q de Tàtari. Su Laboratòriu fiat aprontadu e atretzadu comente logu multi-funtzionale pro s’isvilupu e pro s’istampa manuale di negativos in biancu e nieddu e pro fàghere atividades de pràtica, de istùdiu, de isperimentatzione, de cunfrontu e de unione tràmite s’aina e su limbàgiu de sa fotografia analògica.
Filtro 44
Filtro 44 est unu progetu promòvidu dae s’assòtziu 4CaniperStrada paris cun unu colletivu de fotògrafos chi, intre su 2015 e su 2016, teniat una sede aberta a su pùblicu in carrera de Fermi 44, in Tàtari. Naschet cun sa punna de creare unu puntu de riferimentu pro s’isperimentatzione de limbàgios noos e de tècnicas de sa fotografia, unu logu de chirca, de produtzione e de osservatzione, chi si proponet comente pernu de transitziones contemporàneas chi podent èssere rapresentadas e contadas cun sa fotografia. Sa Càmera Oscura aprontada in sa sede teniat un’ismanniadore IFF donadu dae su fotògrafu tataresu Sarvadore Màsala. Filtro 44 at organizadu espositziones, workshop cun fotògrafos professionistas, addòvios cun autores e laboratòrios subra sos limbàgios de sa fotografia, e at aviadu una rete de cuntatos de importu cun sugetos ativos in Sardigna in su mundu de sa fotografia.