ESPOSITZIONES / CORSOS / WORKSHOP
Dae su 2006 organizamus cursos de fotografia, workshop temàticos, laboratòrios fotogràficos e de càmera oscura, addòvios cun autores, espositziones e colletivas fotogràficas.
Filtro 44 in Tàtari est unu logu fìsicu de 90 mq, cumplementare a su mudamentu de sa sotziedade. Filtro 44 est sa projetzione e sa continuidade de sa mirada, rapresentat s’esperièntzia creativa de su colletivu, de sos grupos e de sos sìngulos, totus impignados in manera parallela in sas dinàmicas de ativismu culturale e artìsticu, progetualidade indipendente dae sa base e partetzipatzione sotziale e polìtica tràmite su limbàgiu de sa fotografia e de s’àudio-visuale. Filtro 44 est su logu in ue si catalizat su resurtadu de s’addòviu, s’isperimentatzione de limbàgios noos de sa fotografia, unu logu de produtzione e de osservatzione che movet dae s’ambiente a inghìriu, una firmada programada de addòvios, de laboratòrios, de espositziones e de cunfrontu tràmite sas imàgines. Filtro 44 est che a su “Kodak Filtru Wratten n. 44 Biaitu-birde craru, cumplementare de su ruju cun un’assorbimentu ladinu de s’ultravioletu”, comente Filtro 44 est in raportu cun sa sotziedade cun un’assorbimento mannu de sa cumplessidade sua.
Filtro 44 fiat unu logu dedicadu a sa chirca fotogràfica e àudio-visuale, unu progetu abertu nàschidu cun sa punna de creare unu puntu de riferimentu pro s’isperimentatzione de limbàgios noos e de tècnicas de sa fotografia, unu logu de produtzione e de osservatzione, de cuncàmbios e de passàgios, chi si pòmpiat a inghìriu e addae de sas làcanas isulanas, comente un’isnodadura de transitziones contemporàneas chi podent èssere rapresentadas e contadas cun sa fotografia. Su cumintzu est su de favorèssere, a un’ala, una dinàmica laboratoriale in ue, isfrutende sas atretzaduras e sos logos a disponimentu, si potzant isperimentare sas tècnicas de sa fotografia analògica e de sa fotografia in istùdiu, si potzant sighire seminàrios, laboratòrios e workshop subra sa genia manna de sos limbàgios fotogràficos; e a s’àtera su de favorèssere sa produtzione de reportage e de campagnas fotogràficas e vìdeo, documentàrios e indàgines, capatzas de ofèrrere una mirada noa e originale, fintzas tràmite esperièntzias colletivas, chi potzant èssere difùndidas tràmite mustras, eventos e publicatziones in pabiru. (Tàtari, 2015-2016)
Mostre/Workshop/Incontro con l’autore – in collaborazione con
Si podet cuntzepire un’espositzione comente una manifestatzione?
Custu diat pòdere èssere su primu esperimentu.
Disarmante, est a nàrrere chi nche catzat sa voluntade de reagire, de replicare e chi lassat sena paràulas; chi est simpre e innotzente de nche cantzellare cada cunflitu.
Ma nois non semus de acordu
e disarmante dìamus chèrrere chi esseret una paràula chi nche toddet sas armas, chi a sos chi vivent dae sa gherra los lasset disarmados; chi disarmet sa terra nostra turmentada.
Sas imàgines trasmitent messàgios, informatziones, identidade.
Sas fotografias documentant bìculos de sa vida nostra e contribuint a la mudare. S’arte projetat su mundu in ue vivimus, pro bìdere mègius e pro lu torrare a creare.
E’ un’espositzione in ue manifestamus, cun creatividade, su che bidimus de su mundu, su chi non cherimus, ca est in custu su chi semus.
Lìberos, semper.
Al Margine est unu logu singulare, de aventura: digressiones subra sa fotografia in ue s’ogetu de chirca est un’esperièntzia esistentziale funguda. Su “margine” est addae, una chirca de sìngios in su mundu de foras: in sas vidas fitianas in intro e in foras de domo, in sas carreras in ue si movent sos pòpulos e sa polìtica, in s’oru de unu banchetone e in sas ispundas de unu desertu, finas a s’espressione cuntzetuale de sa feminilidade e de sas rapresentatziones suas. Al Margine, oe in Tàtari, est unu tzichìrriu de rivendicatzione e de ativismu colletivu, pro afirmare chi su logu de s’intentzione e de sa produtzione fotogràfica non siat pagu seguru, in ue non s’ischit ue nche pònnere sas fotografias, ue las costoire o ue las apicare, ma su logu ue pòdere alimentare unu arresonu costante in su tempus tràmite sa fotografia.
Sardegna Pride 2014 – collettiva POSTHUMAN
Cada sotziedade, cun sas agentzias suas de podere, règulat e èducat in manera sèria meda, in cun ainas diferentes cunforma a su tempus e a su logu, sas vidas, sos corpos e sa sessualidade de sas persones. In sa sotziedade otzidentale nostra (comente in sa traditzionale sarda) sa sessualidade est raportada prus chi no àteru a una pràtica, a sa biologia o petzi a sa riprodutzione, s’imaginàriu sessuale e eròticu reduidu e controlladu cunforma a una visione ètero-normativa, maschilista, familìstica e fundada subra sa croba comente ùnica possibilidade afetiva digna. Est una visione sessuòfoba, repressiva che tendet a sa negatzione de su praghere, duncas una sessualidade prus lìbera e cussente est cunsiderada comente bruta, perigulosa, degradada, perversa. Sa liberatzione dae sos vìnculos normativos chi reduint a fitianu sas maneras nostras de fàghere e de pensare sa sessualidade nche colat peri unu percursu de chirca, de iscoberta e de connoschèntzia personale, de su corpus pròpiu, de sas esperièntzias, sèberos, fantasias, disìgios. Sa sessualidade cussente, duncas, est sa liberada e àuto-determinada, intesa non comente trasgressione dae sos cànones normativos, ma chi ingendrat diversidade e mudamentu. Su de nche barigare una sessualidade cunditzionada est unu traguardu postumanu. POSTHUMAN est sa galavera de sas sugetividades nostras chi nche colat dae s’ischire atzetare e dae su reconnoschimentu de sa sugetividade angena. POSTHUMAN sunt sos chi gherrant cada die pro s’afirmare in una sotziedade chi, cun sas agentzias de podere, lis imponet identidade, rolos, gèneres e sessualidades definidas e interpretadas comente normalidade. POSTHUMAN sunt sos eroes chi nche ghetant sas barrieras de su pregiudìtziu e sos cànones normalizantes chi abbàtigant sas identidades nostras.
LABORATÒRIOS DE FOTOGRAFIA ISPERIMENTALE
SOS LABORATÒRIOS DE FOTOGRAFIA ISPERIMENTALE sunt unu progetu nàschidu dae unu colletivu de fotògrafos pro promòvere una dinàmica de cuncàmbios de sa connoschèntzia in su setore fotogràficu, torrende a elaborare sos cuntzetos teòricos e clàssicos si proponet un’acostiamentu innovativu a sa fotografia artìstica-analògica e digitale.
De Retratos Lìberos
S’iscuta de iscatu in fotografia isperimentale
Su Retratu est unu de sos mòdulos de sa fotografia creativa e visionària proposta in sos Laboratòrios de Fotografia Isperimentale a incuru de sas ofitzinas fotogràficas CaniperStrada, in su tzentru artìsticu culturale auto-gestidu Ex Q. de Tàtari. Su mòdulu de su retratu tenet sa punna de contribuire a dare forma a unu laboratòriu fotogràficu artìsticu abertu, dinàmicu, e creativu subra s’istùdiu de sa fotografia isperimentale, cun s’impreu siat de su traste analògicu e siat digitale. Naschet cun s’intentu de fraigare un’ambientatzione fotogràfica in istùdio, in manera chi su sugetu agatet s’ambiente ideale pro si dedicare a su fotògrafu retratista. Su mòdulu de su retratu s’at a fàghere in sa sala posas, ammaniada in su segundu pranu de s’Ex Cuestura de Tàtari, ue su fotògrafu ritratista at a aprontare una sèrie de retratos de tres sugetos: su betzu, su polìticu, su nudu.
Workshop sul linguaggio fotografico con Alessandro Toscano (Agenzia ON/OFF) – 2013